ಶಿವರಾತ್ರಿ ಉತ್ಸವ.

ಮೊನ್ನೆ ಸಂಪನ್ನಗೊಂಡ  ಶಿವರಾತ್ರಿಯ ಬಗ್ಗೆ ಹೊಸದಿಗಂತದ ಪ್ರಧಾನ ಸಂಪಾದಕರಾದ ಶ್ರೀ ದು.ಗು.ಲಕ್ಷ್ಮಣ್ ರವರು ತಮ್ಮ ನೇರನುಡಿ ಅಂಕಣದಲ್ಲಿ ಅನುಭವ – ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ಓದಿ, ಅಭಿಪ್ರಾಯ ತಿಳಿಸಿ . . .

ನಂದಿಕೇಶ್ವರ ವೇದಿಕೆ, ಗೋಕರ್ಣ, ಫೆ.೨೬ – ಪ್ರತಿಯೊಂದು ರಾತ್ರಿಯೂ ಶುಭ ಮುಂಜಾವಿನ ಪೂರ್ವರಂಗ.

ಶ್ರೀ ಶ್ರೀ ರಾಘವೇಶ್ವರ ಭಾರತಿ ಸ್ವಾಮಿಜಿಯವರ ಆಶೀರ್ವಚನ

ಅಂತೆಯೇ ಶಿವರಾತ್ರಿಯ ಈ ಪರ್ವವು ಸಹ ಎಷ್ಟೋ ಕಾಲದಿಂದ ಅವ್ಯವಾಗಿದ್ದ ಆತ್ಮಲಿಂಗ ಸ್ವರೂಪಿಯಾದ ಶಿವ ತನ್ನ ವಿರಾಟ್ ಸ್ವರೂಪವನ್ನು ತೋರಿಸಿದ್ದಾನೆ. ’ಹರಹರ ಮಹಾದೇವ’ ಎಂಬ ಘೋಷಣೆಯಲ್ಲಿ ಉಳಿದೆಲ್ಲ ಶಬ್ದಗಳು ಮುಚ್ಚಿ ಹೋದವು ಎಂದು ಶ್ರೀ ರಾಘವೇಶ್ವರಭಾರತೀ ಶ್ರೀಗಳು ಮಹಾಶಿವರಾತ್ರಿ ಮಹೋತ್ಸವದ ಸಮಾರೋಪ ಸಭೆಯಲ್ಲಿ ನುಡಿದರು.

ಇದು ಶಿವರಾತ್ರಿಯ ಸಮಾರೋಪ. ಆದರೆ ಹಲವು ಕಾರ್ಯಗಳ ಆರಂಭಕ್ಕೆ ನಾಂದಿ. ಫೆ.೨೭ರಂದು ಇಲ್ಲಿ ಗುರುಕುಲದ ಆರಂಭವಾಗುತ್ತಿದೆ. ಬರುವ ಮಾರ್ಚ್ ೮ರಂದು ಮಠದ ಮೂಲ ಅಶೋಕೆಯಲ್ಲಿ ಶ್ರೀಮಠದ ಮಲ್ಲಿಕಾರ್ಜುನ ಮಂದಿರದ ಜೀರ್ಣೋದ್ಧಾರ, ಆಂಜನೇಯನ ಜನ್ಮಸ್ಥಳದಲ್ಲಿ ದೇವಾಲಯ ನಿರ್ಮಾಣ, ಕೋಟಿರುದ್ರ ಕಾರ್ಯಕ್ರಮ, ಅಷ್ಟಬಂಧ ಈ ಎಲ್ಲವುಗಳ ಆರಂಭಕ್ಕೆ ಈ ಸಮಾರೋಪ ಸೋಪಾನವಾಗಲಿದೆ ಎಂದರು. ಅದಲ್ಲದೇ ಆದಿಗೋಕರ್ಣ, ವೀರಭದ್ರ ದೇವಾಲಯಗಳ ನವೀಕರಣ ಕಾರ್ಯ ಒಟ್ಟೊಟ್ಟಿಗೇ ಪ್ರಾರಂಭವಾಗಲಿದೆ ಎಂದರು.

ಈ ಸಂಭ್ರಮದಲ್ಲಿ ನಾವು ಸಾಕ್ಷಿ ಮಾತ್ರ. ಎಲ್ಲ ಕೆಲಸವನ್ನು ಊರಿನ ಜನರು, ಕಾರ್ಯಕರ್ತರು ನಡೆಸಿದ್ದಾರೆ. ಎಲ್ಲರೂ ಸೇರಿ ಈ ಕ್ಷೇತ್ರದ ಸರ್ವಾಂಗೀಣ ಅಭಿವೃದ್ಧಿಯನ್ನು ಮಾಡಬೇಕಿದೆ. ಇದೀಗ ಪ್ರಾರಂಭಗೊಂಡ ಪರಿವರ್ತನೆಯ ಹೊಸಗಾಳಿ, ಹೊಸಶಕೆಯೊಂದನ್ನು ಸ್ಥಾಪಿಸಿದೆ. ಈ ಬದಲಾವಣೆ ಜನರಿಗೇ ಕಲ್ಯಾಣವನ್ನುಂಟುಮಾಡಲಿ ಎಂದು ಪೂಜ್ಯ ಶ್ರೀಗಳು ಹಾರೈಸಿದರು.

ಸಂಸದ ಅನಂತಕುಮಾರ ಹೆಗಡೆ ಶಿವಸಂದೇಶ ನೀಡುತ್ತಾ ಶಿವಮಯವಾದ ಈ ಗೋಕರ್ಣ ಕ್ಷೇತ್ರದಲ್ಲಿ ಇದೇ ಮೊದಲಬಾರಿಗೆ ಅಚ್ಚುಕಟ್ಟಾಗಿ, ತುಂಬ ವ್ಯವಸ್ಥಿತವಾಗಿ, ವೈಭವಯುತವಾಗಿ ಶಿವರಾತ್ರಿ ಉತ್ಸವ ನಡೆದಿದೆ. ಇದು ಗೋಕರ್ಣದ ಕೀರ್ತಿಯನ್ನು, ಶೋಭೆಯನ್ನು ಹೆಚ್ಚಿಸುವಂತಹುದು. ಗೋಕರ್ಣಕ್ಕೆ ಹಿಂದಿನ ಹಿರಿಮೆ, ಗರಿಮೆಗಳನ್ನು ಪಡೆಯಬೇಕೆಂಬ ಆಕಾಂಕ್ಷೆ ಸಮಾಜದ್ದು. ಅಂತಹ ನಿರೀಕ್ಷೆಯತ್ತ ಮೊದಲ ಹೆಜ್ಜೆ ಪ್ರಾರಂಭವಾಗಿದೆ. ಇದು ತುಂಬ ಸಂತೋಷದ ಸಂಗತಿ. ಪೂಜ್ಯ ಶ್ರೀ ರಾಘವೇಶ್ವರ ಶ್ರೀಗಳ ಮಾರ್ಗದರ್ಶನ, ನೇತೃತ್ವದಲ್ಲಿ ಜಾಗತಿಕ ಸ್ತರದ ಪ್ರಸಿದ್ಧಿ ಗೋಕರ್ಣಕ್ಕೆ ದೊರಕಲಿದೆ ಎಂಬ ವಿಶ್ವಾಸವನ್ನು ವ್ಯಕ್ತಪಡಿಸಿದರು.

ಹೊಸದಿಗಂತ ಪತ್ರಿಕೆಯ ಪ್ರಧಾನ ಸಂಪಾದಕ ದು.ಗು. ಲಕ್ಷ್ಮಣ್ ಅವರು ಈ ನಂದಿಕೇಶ್ವರ ವೇದಿಕೆ ಒಂಭತ್ತು ದಿನಗಳಲ್ಲಿ ಹಲವು ಜಾತಿ, ಮತ, ಪಂಥಗಳ, ಸ್ವಾಮಿಗಳ, ಸಂತರ, ಗಣ್ಯರ ಸಮನ್ವಯಕ್ಕೆ ಸಾಕ್ಷಿಯಾಗಿದೆ. ಇಬ್ರಾಹಿಂ ಸುತಾರಾರಂತಹ ಸೂಫಿ ಸಂತರೂ ಇಲ್ಲಿದ್ದಾರೆ. ಜೊತೆಗೆ ಉಳಿದ ಮಠಗಳ ಪೀಠಾಧೀಶರೂ ಇದ್ದಾರೆ. ಇದು ಸಾಮರಸ್ಯದ ದೃಷ್ಟಿ. ಪೂಜ್ಯ ಶ್ರೀಗಳು ತಮ್ಮ ಹೃತ್ಪೂರ್ವಕ ಪ್ರೀತಿಯಿಂದಲೇ ಎಲ್ಲರನ್ನೂ ಗೆದ್ದಿದ್ದಾರೆ. ಅವರು ಯಾವ ಕಾರ್ಯಕ್ರಮವನ್ನು ಹಾಕಿಕೊಂಡರೂ ಅದರಲ್ಲಿ ಸಮಾಜಕ್ಕೆ ಅಗತ್ಯವಾದ ಗುಣಾತ್ಮಕವಾದ ಬದಲಾವಣೆಯನ್ನು ಹೊಂದಿದ ಹೊಸತನ ಇದ್ದೇ‌ಇರುತ್ತದೆ. ಕಟ್ಟುವುದು ಅವರ ಸ್ವಭಾವ. ಸಮಾಜ ಮುಖಿಯಾದ ಚಿಂತನೆ ಆಗಬೇಕೆಂಬುದೇ ಇಂದಿನ ಶಿವಸಂದೇಶ. ನಮ್ಮ ಸಮಾಜದ ಮೇಲೆ ನಡೆಯುತ್ತಿರುವ ಸಾಂಸ್ಕೃತಿಕ ಧಾಳಿಯನ್ನು ತಡೆಯಬೇಕಿದೆ. ಸಶಕ್ತ ಸಮುದಾಯವನ್ನು ಕಟ್ಟಬೇಕಿದೆ. ಈ ವೇದಿಕೆ ಅದಕ್ಕೆ ಶ್ರೀಕಾರ ಹಾಕಿದೆ ಎಂದು ಹೇಳಿದರು.

ಭಾ.ಜ.ಪಾ.ದ ಉತ್ತರ ಕನ್ನಡ ಜಿಲ್ಲಾ ಘಟಕದ ಅಧ್ಯಕ್ಷ ವಿನೋದ ಪ್ರಭು ಗುರು ಸಮಾಜಕ್ಕೆ ಮಾರ್ಗದರ್ಶನ ನೀಡಿ, ಸನ್ಮಾರ್ಗದಲ್ಲಿ ನಡೆಸುವವರು. ಸ್ವಾರ್ಥವನ್ನು ತ್ಯಜಿಸಿ, ಪರಹಿತವನ್ನು ಜಯಿಸಿ ಜೀವಿಸುವಂತಹ ಸ್ವಭಾವವನ್ನು ನಮ್ಮಲ್ಲಿ ಮೂಡಿಸಿ ಬದುಕನ್ನು ಸಾರ್ಥಕಗೊಳಿಸುತ್ತಾರೆ ಎಂದು ನುಡಿದರು.

ಚಲನಚಿತ್ರನ ನಟ ಸುರೇಶ್ ಒಬೆರಾಯ್ ಸುಂದರ ಕಥೆಗಳೊಂದಿಗೆ ಬದುಕಿನ ಸಾರ್ಥಕತೆಯನ್ನು ಪ್ರತಿಪಾದಿಸಿದರು.

ಗಂವ್ಹಾರದ ತ್ರಿವಿಕ್ರಮಾನಂದ ಸರಸ್ವತೀ ಮಠದ ಶ್ರೀ ಸೋಪಾನನಾಥ ಸ್ವಾಮಿಗಳು ಜಗತ್ತಿನಲ್ಲಿ ಆತ್ಮಲಿಂಗ ಒಂದೇ. ಶಿವನನ್ನು ತೋರಿಸುವ ಗುರುವೂ ಒಬ್ಬನೇ. ಅನೇಕ ಮಣಿಗಳ ಹಾರದಂತೆ ಇರುವ ರಾಘವೇಶ್ವರ ಶ್ರೀಗಳು ಶಿವ ದರ್ಶನವನ್ನು ಮಾಡಿಸಿದ್ದಾರೆ. ಗೋಸೇವೆಯನ್ನು ಶ್ರೀಗಳು ನಡೆಸುತ್ತಿರುವುದು ನಮ್ಮೆಲ್ಲರ ಭಾಗ್ಯ. ಲೋಕಪೀಡಕರವಾದ ಆಸುರೀ ಶಕ್ತಿಯನ್ನು ಮಟ್ಟಿನಿಂತ ಕ್ಷೇತ್ರ ಗೋಕರ್ಣ. ಸತ್ಯಧರ್ಮಕ್ಕೆ ಜಯ ಎಂಬುದನ್ನು ಸಾಕ್ಷೀಕರಿಸಿದೆ ಎಂದರು.

ಉದ್ಯಮಿ ಮುರಳೀಧರ ಪ್ರಭು ಉತ್ಸವದ ಸಮಗ್ರ ಅವಲೋಕನ ಮಾಡುತ್ತ ಈ ಒಂಭತ್ತು ದಿನಗಳ ನವರಾತ್ರಿಯ ಶುಭಸಂದೇಶವನ್ನು, ಶಿವಪ್ರಸಾದವನ್ನು ನಾವು ಸ್ವೀಕರಿಸಬೇಕಿದೆ. ಮಹಾ ಸಂಕಲ್ಪ ದಿನದಂದು ಶ್ರೀಗಳು ಈ ದೇವಾಲಯವನ್ನು ಲೋಕಾರ್ಪಣೆ ಮಾಡುವುದಾಗಿ ಹೇಳಿದ್ದರು. ಉತ್ಸವದಲ್ಲಿ ಪಾಲ್ಗೊಂಡ ಜನರನ್ನು ನೋಡಿದಾಗ ಈ ಮಾತಿನ ಸತ್ಯಾಸತ್ಯತೆ ಗೋಚರಿಸಿತು. ಇದೊಂದು ವಿಶಿಷ್ಟ ವೇದಿಕೆ. ಹಲವಾರು ಸಾಂಸ್ಕೃತಿಕ ಕಾರ್ಯಕ್ರಮಗಳು, ಧರ್ಮಸಭೆ ಮೊದಲಾದ ಹಲವು ಹೊಸತುಗಳ ಆಯೋಜನೆ ನಡೆದಿದೆ. ಜನಮಾನಸದಲ್ಲಿ ಚಿರಸ್ಥಾಯಿಯಾಗಿ ಈ ಶಿವರಾತ್ರಿ ನಿಲ್ಲಲಿದೆ ಎಂದು ಹೇಳಿದರಲ್ಲದೇ ಈ ಒಂಭತ್ತು ದಿನಗಳ ಕಾಲ ನಡೆಸಿದ ಅಖಂಡ ಭಜನೆ, ಅಮೃತಾನ್ನ ಮೊದಲಾದ ವಿಭಾಗಗಳಲ್ಲಿ ಅವಿಶ್ರಾಂತವಾಗಿ ದುಡಿದ ಎಲ್ಲ ಕಾರ್ಯಕರ್ತರ ಸೇವೆಯನ್ನು ಕೃತಜ್ಞತಾ ಭಾವದಿಂದ ಸ್ಮರಿಸಿದರು.

ಈ ಅರ್ಥಪೂರ್ಣ ಸಮಾರೋಪ ಸಭೆಯನ್ನು ಬೆಂಗಳೂರಿನ ಉದ್ಯಮಿ ಎಂ.ಎನ್. ಭಟ್ ಮದ್ಗುಣಿ ಪೂಜೆ ಮಾಡಿ, ಸ್ವಾಗತಿಸಿದರು.

ಗೋಕರ್ಣದ ಶಿವರಾತ್ರಿಯ ವಿಶೇಷ ವಿವರಗಳು

ಧರ್ಮಸಭೆ, ಸಾರ್ವಭೌಮ ಪ್ರಶಸ್ತಿಯ ಮುಖಾಂತರ ನಾಡು, ನುಡಿ, ನಡೆಗೆ ಅಪ್ರತಿಮ ಸೇವೆ ಸಲ್ಲಿಸಿದವರಿಗೆ ಪುರಸ್ಕಾರ, ಗಂಗಾ ಜಲಾಭಿಷೇಕ, ಸಾಂಸ್ಕೃತಿಕ ಸಂಜೆ ಇವೆಲ್ಲವೂ ಈ ಶಿವರಾತ್ರಿಯ ಹೊಸತನ.

ಸಾಮಾನ್ಯವಾಗಿ ರಾಮಚಂದ್ರಾಪುರಮಠದ ಕಾರ್ಯಕ್ರಮವೆಂದರೆ ಸಾಕು ಏನೋ ನಾವೀನ್ಯತೆ ಇದ್ದೇ ಇರುತ್ತದೆ ಎಂಬಷ್ಟರ ಮಟ್ಟಿಗೆ ಶ್ರೀಮಠದ ಆಯೋಜನೆಗಳು ಹೆಸರುವಾಸಿಯಾಗಿವೆ. ಈ ಹಿನ್ನೆಲೆಯಲ್ಲಿ ಉತ್ಸವದಲ್ಲಿ ಪಾಲ್ಗೊಂಡ ಹಲವಾರು ಭಕ್ತರನ್ನು, ಯಾತ್ರಿಕರನ್ನು ಮಾಧ್ಯಮ ಕೇಂದ್ರ ಮಾತಿಗೆಳೆದಾಗ ಬಂದ ಪ್ರತಿಕ್ರಿಯೆಗಳು ಇಂತಿವೆ.

ಇಲ್ಲಿಗೆ ಮಹಾಬಲನ ಅರ್ಚನೆಗೆಂದೇ ಬಂದವರು, ಉತ್ಸವದ ಸೊಬಗನ್ನು ಸವಿಯಲೆಂದು ಬಂದವರು, ಶ್ರೀಮಠದ ಆಡಳಿತ ನಿರ್ವಹಣೆಯಲ್ಲಿನ ಮೊದಲ ಶಿವರಾತ್ರಿಯನ್ನು ಕಾಣಬಂದವರು ಹೀಗೆ ಎಲ್ಲ ಆಶೋತ್ತರಗಳ ಜನಸಾಗರ ಗೋಕರ್ಣದತ್ತ ಮುಖಮಾಡಿತ್ತು.

ದೂರದ ಬೆಳಗಾವಿಯ ಕಡೆಯಿಂದ ಬಂದ ಸಿದ್ದಪ್ಪ ಬಡಿಗೇರ ’ಈ ಸಲ ಜನ ಜಾಸ್ತಿಯಲ್ರೀ, ಹಾಂಗಾಗಿ ಕ್ಯೂನಲ್ಲಿ ತುಂಬ ಹೊತ್ತು ಕಾಯ್ಬೇಕಿತ್ರೀ. ಆದ್ರೂ ದೇವರ ದರ್ಶನ ಆತ್ನೋಡ್ರಿ’ ಅಂತ ಹೇಳ್ತಾರೆ.

ಗುಲ್ಬರ್ಗದ ಮಹಾಂತೇಶ ’ನಾವಂತೂ ಕಾಶಿಗೆ ಎಂದ್ ಹೋಗ್ತೀವೋ ಗೊತ್ತಿಲ್ಲ ನೋಡ್ರಿ, ಆದ್ರೂ ಗಂಗಾ ಜಲದಿಂದ ಅಭಿಷೇಕ ಮಾಡೋ ವ್ಯವಸ್ಥಿ ಅಗ್ದೀ ಚಲೋ ಅದಾ’.

ಉಡುಪಿಯ ಶ್ರೀನಿವಾಸ ಹೆಬ್ಬಾರರಿಗೆ ಒಂಭತ್ತು ದಿನಗಳ ಕಾಲ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮಗಳು ತುಂಬ ಖುಷಿಕೊಟ್ಟವಂತೆ. ಅದರಲ್ಲಿಯೂ ಇಬ್ರಾಹಿಂ ಸುತಾರಾರ ’ಅಧ್ಯಾತ್ಮ ಸಂವಾದ ತರಂಗಿಣಿ’ಯ ನೀತಿ, ಕಥೆ, ಸಂವಾದ, ಗೀತ, ಹಾಸ್ಯಗಳ ಪಂಚಾಮೃತ ಹೃದಯಕ್ಕೇ ನಾಟಿತು ಎಂದು ಹೇಳುವುದನ್ನು ಮರೆಯಲಿಲ್ಲ.

ಸಾಗರದ ಸುಬ್ರಹ್ಮಣ್ಯ ಭಟ್ ಕೇಶವ ಹೆಗಡೆ ಇವರಿಗೆ ಧರ್ಮಸಭೆಯಲ್ಲಿ ನಾಡು ನುಡಿಗೆ ಸೇವೆಗೈದ ಗಣ್ಯರಿಗೆ ’ಸಾರ್ವಭೌಮ ಸಮ್ಮಾನ’ದಿಂದ ಗೌರವಿಸಿದ್ದು ಧನ್ಯತೆಯನ್ನು ಭಾವಿಸುವಂತಾಗಿದೆ.

ಒಟ್ಟಾರೆಯಾಗಿ ಬಂದೆಲ್ಲ ಭಕ್ತರಿಗೆ ಕೊಡಮಾಡಿದ ಉಚಿತ, ಶಿಸ್ತುಬದ್ಧ ಅಮೃತಾನ್ನ ಭೋಜನ ವ್ಯವಸ್ಥೆ ಮತ್ತು ಅದಕ್ಕಾಗಿ ಹಗಲು ರಾತ್ರಿಗಳೆನ್ನದೇ ಅವಿರತವಾಗಿ ದುಡಿದ ಶಿವಸೇವಕರು ಎಲ್ಲರ ಪ್ರಶಂಸೆಗೆ ಪಾತ್ರರಾಗಿದ್ದಾರೆ. ಕಾರ್ಯಕ್ರಮದ ಆಯೋಜನೆಯ ಹಿನ್ನೆಲೆ, ಶೈಲಿ, ಅದು ಎಲ್ಲರನ್ನೂ ತನ್ನೆಡೆಗೆ ಬರಮಾಡಿಕೊಂಡು, ತನ್ನಲ್ಲಿ ಸೆಳೆದುಕೊಂಡ ರೀತಿಯನ್ನು ಬಣ್ಣಿಸಲು ಮಾತುಗಳಿಲ್ಲವಾಗಿವೆ.

ಯಕ್ಷಗಾನ ದಿಗ್ಗಜ ದಿ.ಕೆರೆಮನೆ ಶ್ರೀ ಶಂಭು ಹೆಗಡೆಯವರಿಗೆ ಸಾರ್ವಭೌಮ ಸಮ್ಮಾನ ಪ್ರಶಸ್ತಿ ಪ್ರದಾನ.

ಶಿವರಾತ್ರಿಯ ಉತ್ಸವದ ಎಂಟನೆಯ ದಿನದ ಧರ್ಮಸಭೆಯಲ್ಲಿ ಸಾನ್ನಿಧ್ಯವನ್ನಿತ್ತು ಅನುಗ್ರಹಿಸಿದ ಶ್ರೀಗಳು ರಾಮ ಪೂಜಕರಾದ ಪೂಜ್ಯ ರಾಘವೇಶ್ವರಭಾರತೀ ಶ್ರೀಗಳು ಶಿವಸೇವೆಗೆ ಸನ್ನದ್ಧರಾಗುವ ಸಂಕಲ್ಪವನ್ನು ಸ್ವತಃ ಶಿವನೇ ಮಾಡಿಸಿದ್ದಾನೆ. ಶ್ರೀಗಳಿಂದಾಗಿ ಗೋಕರ್ಣ ಸುವರ್ಣವಾಗುತ್ತಿದೆ. ಪರಮಾತ್ಮನಿಗೆ ಜಾತಿ, ಮತ, ಪಂಥಗಳ ಯಾವ ಕಟ್ಟುಪಾಡೂ ಇಲ್ಲ. ಆತ ಪ್ರೀತಿ, ಶ್ರದ್ಧೆಗಳಿಗೆ ಮಾತ್ರ ಲಭ್ಯ ಎಂದು ಹೇಳಿದ್ದರಲ್ಲದೇ ಸ್ವತಃ ತಾವೇ ರಚಿಸಿದ ಚೌಪದಿಗಳನ್ನು ಹಾಡಿ, ಬದುಕಿನಲ್ಲಿ ಪರಮಾತ್ಮನ ಸ್ಥಾನವನ್ನು ವಿಶದೀಕರಿಸಿದ್ದಾರೆ.

ಮರಣೋತ್ತರವಾಗಿ ಯಕ್ಷಗಾನ ದಿಗ್ಗಜ ಕೆರೆಮನೆ ಶಂಭು ಹೆಗಡೆಯವರಿಗೆ ನೀಡಲಾದ ’ಸಾರ್ವಭೌಮ ಸಮ್ಮಾನ’ವನ್ನು ಸ್ವೀಕರಿಸಿದ ಅವರ ಪುತ್ರ ಶಿವಾನಂದ ಹೆಗಡೆಯವರು ನನ್ನ ತಂದೆಯವರಿಗೆ ಈ ಪೀಠದಲ್ಲಿ ತುಂಬಾ ಶ್ರದ್ಧೆ ಮತ್ತು ಭಕ್ತಿ ಇತ್ತು. ಶ್ರೀಗಳ ಗೋ ರಕ್ಷಣಾ ಕಾರ್ಯವನ್ನು ಬಹಳವಾಗಿ ಪ್ರಶಂಸಿಸುತ್ತಿದ್ದವರು. ಇದೊಂದು ಅಸಾಧಾರಣ ಕ್ರಾಂತಿ ಎಂಬುದು ಅವರ ಆಶಯವಾಗಿತ್ತು. ಕಲೆಯ ವಿಷಯದಲ್ಲಿ ಎಂದೂ ರಾಜಿಮಾಡಿಕೊಳ್ಳಲಾದ ಅವರ ಆದರ್ಶ, ಶಿಸ್ತುಗಳಲ್ಲಿ ಬೆಳೆದ ನಾನು ಅವರಿಗೆ ನುಡಿಯಲ್ಲಿ ನಮನ ಸಲ್ಲಿಸದೇ ನಡೆಯ ಮೂಲಕವೇ ಶ್ರದ್ಧಾಂಜಲಿ ಸಲ್ಲಿಸುತ್ತೇನೆ ಎಂದರು. ಅಲ್ಲದೇ ಅವರ ಕಲಾರಾಧನೆಯನ್ನು ನಮ್ಮ ಕುಟುಂಬ ಮುಂದುವರೆಸಿಕೊಂಡು ಹೋಗುತ್ತದೆ ಮತ್ತು ಅವರು ನಮ್ಮೊಡನಿದ್ದು ಈ ಪ್ರಶಸ್ತಿ ಸ್ವೀಕರಿಸಿದ್ದರೆ ತನ್ನ ಜನ್ಮ ಪಾವನವೆಂದು ಅಂದುಕೊಳ್ಳುತ್ತಿದ್ದರು. ಎಂದು ಹೇಳುತ್ತಾ ಬಹಳ ಭಾವುಕರಾಗಿ ಮನದಾಳದ ಭಾವನೆಗೆ ಭಾಷೆ ಕೊಟ್ಟರು.

ರಾಜ್ಯ ಅಲ್ಪಸಂಖ್ಯಾತ ಆಯೋಗದ ಮಾಜಿ ಅಧ್ಯಕ್ಷ ಅನ್ವರ್ ಮಾಣಿಪ್ಪಾಡಿ ಯಾರಿಗೂ, ಯಾವಕಾಲಕ್ಕೂ ಭಯೋತ್ಪಾದನೆ, ಅಶಾಂತಿ ಮೊದಲಾದವುಗಳು ಒಳ್ಳೆಯದನ್ನು ಮಾಡಿಲ್ಲ. ’ವಸುಧೈವ ಕುಟುಂಬಕಂ’ ಎಂಬ ಅತ್ಯಪೂರ್ವ ಸಂದೇಶವನ್ನು ಮೊದಲು ನೀಡಿದ್ದು ನಮ್ಮ ಭಾರತ. ಇದನ್ನು ಅರ್ಥಮಾಡಿಕೊಂಡು ನಡೆದರೆ ಸಮಾಜಕ್ಕೆ ಸಹಜವಾಗಿಯೇ ಶಾಂತಿ ದೊರೆಯುತ್ತದೆ. ಸಮಾಜ ಎಂಬ ಮರದ ಬೇರು ಧರ್ಮದಲ್ಲಿದೆ. ಬೇರಿಗೆ ನೀರೆರೆದರೆ ಮಾತ್ರ ಸುಂದರವಾದ ಹೂವು ಹಣ್ಣುಗಳನ್ನು ಪಡೆಯಬಹುದು. ಬೇರೊಣಗಿದರೆ ಮರ ಸಾಯುತ್ತದೆ. ಇಂತಹ ಸಮಾಜ ವೃಕ್ಷಕ್ಕೆ ರಾಘವೇಶ್ವರ ಶ್ರೀಗಳು ಧರ್ಮವೆಂಬ ಸಿಂಚನ ಮಾಡಿ ವಿಶ್ವವನ್ನು ಪೋಷಿಸುತ್ತಿದ್ದಾರೆ ಎಂದು ನುಡಿದರು.

ಪತ್ರಕರ್ತ ಬಾಬು ಕೃಷ್ಣಮೂರ್ತಿಯವರು ಭಾರತೀಯ ಸಂಸ್ಕೃತಿಗೆ ಎಂದೂ, ಯಾವ ಲೋಪವೂ ಆಗದು. ಅದು ಅವಿನಾಶಿ. ಗೋ ರಕ್ಷಣೆ, ರಾಮಾಯಣ ಮಹಾಸತ್ರ ಮೊದಲಾದ ಎಲ್ಲ ಕಾರ್ಯಕ್ರಮಗಳೂ ಸಂಸ್ಕೃತಿ ಪೋಷಕವಾದ ಕಾರ್ಯಗಳು ಎಂದು ಅಭಿಪ್ರಾಯಪಟ್ಟರು.

ರಾಘವೇಶ್ವರ ಶ್ರೀಗಳವರು ಗಾಳಿ ಎಲ್ಲೆಡೆಯಿದ್ದರೂ ನಮ್ಮ ವಿಶೇಷ ಉಪಯೋಗಕ್ಕೆಂಬಂತೆ ಪಂಖವನ್ನು ಹಾಕಿಕೊಂಡ ಹಾಗೆ ಪರಮಾತ್ಮನ ಸಾನ್ನಿಧ್ಯಕ್ಕೆ ಮಂದಿರ ಬರಬೇಕು. ಕೆಲವು ವಿಶಿಷ್ಟ ಕ್ಷೇತ್ರಗಳಲ್ಲಿ ವಿಶೇಷ ಸಂದರ್ಭಗಳಲ್ಲಿ ಭಗವಂತನ ಸಾನ್ನಿಧ್ಯ ಅತಿಶಯವಾಗಿರುತ್ತದೆ. ಶಿವರಾತ್ರಿ ಅಂತಹುದೇ ಒಂದು ಪರ್ವ. ಇಂದು ರಥೋತ್ಸವ. ಗರ್ಭಗುಡಿಯೊಳಗಿರುವ ದೇವರು ರಥವನ್ನೇರಿ ಜನರಿಗೆ ತನ್ನನ್ನು ತೆರೆದುಕೊಳ್ಳುತ್ತಾನೆ. ಈ ಸಂದರ್ಭವನ್ನು ನೋಡದೇ ಕಣ್ಣು ಮುಚ್ಚಿಕೊಂಡರೆ ಅದು ನಮ್ಮ ತಪ್ಪೇ ಹೊರತು ಈಶ್ವರನದಲ್ಲ. ಇಂದು ರಥೋತ್ಸವದಲ್ಲಿ ಶಿವನನ್ನು ಕುಳ್ಳಿರಿಸದ ಹಾಗೆ ನಮ್ಮ ಬದುಕಿನ ರಥದಲ್ಲಿ ಶಿವನನ್ನು ಪ್ರತಿಷ್ಠಾಪಿಸೋಣ. ಜೀವನ ರಥವನ್ನು ಎಳೆಯೋಣ ಎಂದು ನುಡಿದರು.

ಗೋಕರ್ಣ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆ ಭಾರತೀ ದೇವತೆ, ಉದ್ಯಮಿ ಎಂ.ಎನ್. ಭಟ್ ಮದ್ಗುಣಿ, ಚಲನಚಿತ್ರ ನಟ ಸುರೇಶ್ ಒಬೆರಾಯ್ ಶಿವ ಸಂದೇಶವನ್ನಿತ್ತರು.

ಸಾರ್ವಭೌಮ ಸಮ್ಮಾನ ಸ್ವೀಕರಿಸುತ್ತಿರ್ವ ಶ್ರೀ ಮೋಹನ ಆಳ್ವ

ಇಂತಹ ಮಹತ್ತ್ವಪೂರ್ಣ ಸ್ಥಾನದಲ್ಲಿರುವ ನಮಗೆ ಸಾಮಾಜಿಕ ಜವಾಬ್ದಾರಿಯೂ ಇದ್ದೇ‌ಇದೆ ಎಂದು ಖ್ಯಾತ ಶಿಕ್ಷಣ ತಜ್ಞ ಮೂಡಬಿದರೆಯ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ. ಮೋಹನ ಆಳ್ವ ಹೇಳಿದ್ದಾರೆ.

ಇಲ್ಲಿ ಮಹಾಶಿವರಾತ್ರಿಯ ’ಸಾರ್ವಭೌಮ ಪ್ರಶಸ್ತಿ’ಯನ್ನು ಸ್ವೀಕರಿಸಿ ಮಾತನಾಡುತ್ತಿದ್ದ ಅವರು ನಮ್ಮ ಪ್ರಾಚೀನರು ಅದ್ಭುತ ರೀತಿಯಲ್ಲಿ ದೇವಾಲಯಗಳನ್ನು, ಧಾರ್ಮಿಕ ಶ್ರದ್ಧಾ ಕೇಂದ್ರಗಳನ್ನೂ ನಿರ್ಮಿಸಿದ್ದಾರೆ. ಅವರ ಧಾರ್ಮಿಕ ಚಿಂತನೆ, ಪ್ರದರ್ಶನ ಕಲೆಯ ಸಂಸ್ಕೃತಿ, ಆಧ್ಯಾತ್ಮಿಕ ಚಿಂತನೆಗಳು ಶತಮಾನಗಳ ಕಾಲ ಭಾರತೀಯರನ್ನು ರುಜು ಮಾರ್ಗದಲ್ಲಿ ಮುನ್ನಡೆಸುವಂತಹವುಗಳಾಗಿದ್ದು, ಇಂತಹ ಸಂಸ್ಕೃತಿಯ ವಾರಸುದಾರರಾದ ನಮ್ಮ ಮೇಲೆ ಹಲವಾರು ಸಾಮಾಜಿಕ ಉತ್ತದಾಯಿತ್ವಗಳಿವೆ ಎಂದರು. ಶ್ರೀ ರಾಘವೇಶ್ವರಭಾರತೀ ಶ್ರೀಗಳದ್ದು ಮಗುವಿನಂತಹ ಮುಗ್ಧ ಮನಸ್ಸು. ಇಂತಹ ಶ್ರೀಗಳು ಈಗಾಗಲೇ ಹಲವು ಹೊಸತುಗಳನ್ನು ನೀಡಿ ಖ್ಯಾತರಾಗಿದ್ದಾರೆ. ಇದೀಗ ಗೋಕರ್ಣ ಕ್ಷೇತ್ರದ ಸರ್ವಾಂಗೀಣ ಅಭಿವೃದ್ಧಿಗಾಗಿ ಕಟಿಬದ್ಧರಾಗಿದ್ದಾರೆ ಎಂದು ನುಡಿದರು.

ಕೆ.ಪಿ.ಸಿ.ಸಿ. ಉಪಾಧ್ಯಕ್ಷ ಉಮೇಶ್ ಭಟ್ ಮಾತನಾಡಿ ನಾವು ಸದಾ ನಮ್ಮ ಸ್ವಂತದ ಬಗೆಗೆ ಚಿಂತಿಸುತ್ತೇವೆ. ಆದರೆ ಮಠಾಧೀಶರು, ಸಂತರು ಸುತ್ತಲಿನ ಸಮಾಜದ ಬಗ್ಗೆ ಯೋಚಿಸುತ್ತಿರುತ್ತಾರೆ. ಅರವತ್ತು ವರ್ಷಗಳ ನನ್ನ ಅನುಭವದಲ್ಲಿ ಇದೇ ಮೊದಲ ಬಾರಿಗೆ ನಾನು ಸ್ಪಷ್ಟ ಗೋಕರ್ಣವನ್ನು ನೋಡುತ್ತಿದ್ದೇನೆ. ವಾಸ್ತವವಾಗಿ ಶ್ರೀಗಳು ಎಂದೂ ಗೋಕರ್ಣ ಕ್ಷೇತ್ರವನ್ನು ಬಯಸಲಿಲ್ಲ. ನಾನೂ ಸೇರಿದಂತೆ ಕ್ಷೇತ್ರದ ಅಭಿವೃದ್ಧಿಗಾಗಿ ಚಿಂತಿಸಿದ ಹಲವರು ಶ್ರೀಗಳಲ್ಲಿ ಈ ಕ್ಷೇತ್ರವನ್ನು ತೆಗೆದುಕೊಂಡು ಅಭಿವೃದ್ಧಿಪಡಿಸುವಂತೆ ಒತ್ತಾಯಿಸಿದ್ದೆವು. ಈ ಹಸ್ತಾಂತರ ಕ್ರಮ ಪ್ರತಿಶತ ನೂರರಷ್ಟು ಸರಿ. ಏಕೆಂದರೆ ಸಮಾಜದ ಕೊಟ್ಟ ಕೊನೆಯ ವ್ಯಕ್ತಿಯವರೆಗೂ ಸಹ ಅಭಿವೃದ್ಧಿಯ ಪಾಲು ದೊರಕಬೇಕೆಂಬುದು ಪೂಜ್ಯ ಶ್ರೀಗಳ ಆಶಯ. ಈಗಾಗಲೇ ಗೋಕರ್ಣದ ಚಿತ್ರಣವನ್ನು ಬದಲಾಯಿಸಿ ಹೊಸ ಪರಿವರ್ತನೆಗೆ ಕಾರಣವಾದ ಅವರು ಕೆಲವೇ ಕಾಲದಲ್ಲಿ ಗೋಕರ್ಣವನ್ನು ಜಾಗತಿಕ ಸ್ತರದಲ್ಲಿ ಪ್ರಸಿದ್ಧಪಡಿಸುತ್ತಾರೆ ಎಂದು ಹೇಳಿದರು.

ಸುಬ್ರಹ್ಮಣ್ಯದ ಮಠಾಧೀಶ ಶ್ರೀ ವಿದ್ಯಾಪ್ರಸನ್ನತೀರ್ಥ ಶ್ರೀಗಳವರು ಹತ್ತು ತಲೆಯ ರಾವಣ ಇಲ್ಲಿ ಭಗವಂತನನ್ನು ಪಡೆಯಲು ಪ್ರಯತ್ನಿಸಿ ಸೋತ ಘಟನೆ ಹತ್ತಾರ ವಿಷಯಗಳತ್ತ ಮನಸ್ಸು ಹಾಕಿದ ಮನುಷ್ಯನಿಗೆ ದೇವರನ್ನು ಪಡೆಯಲು ಸಾಧ್ಯವಾಗದು, ತದೇಕ ನಿಷ್ಠೆಯಿಂದ ಇಲ್ಲದೇ ಬದುಕಿನಲ್ಲಿ ಶ್ರೇಷ್ಠವಾದದ್ದು ಅಲಭ್ಯ ಎಂಬುದಕ್ಕೆ ಸಂಕೇತ. ನಮ್ಮ ಬದುಕಿಗೆ ಒಂದು ಎಲ್ಲೆ ಇದೆ. ಅದನ್ನು ಎಂದೂ ಮೀರಬಾರದು. ಸಮುದ್ರಕ್ಕೆ ಗಡಿಯಿದ್ದಂತೆ ಇಂತಹ ಗುಣದಿಂದಾಗಿಯೇ ಶ್ರೀರಾಮಚಂದ್ರ ಮರ್ಯಾದಾ ಪುರುಷೋತ್ತಮ ಎನಿಸಿಕೊಂಡ. ಇಂತಹ ರಾಮನನ್ನು ಆರಾಧಿಸುವ ಶ್ರೀ ರಾಘವೇಶ್ವರರು ಗೋಕರ್ಣದ ಹೊಸ ಸೃಷ್ಟಿಗೆ ಹೊರಟಿದ್ದಾರೆ. ಅಂತರಂಗ ಶುದ್ಧಿಗೆ ಬಹಿರಂಗ ಶುದ್ಧಿಯೂ ಅಗತ್ಯ ಎಂದು ಹೇಳಿ ತಮ್ಮ ಮತ್ತು ರಾಮಚಂದ್ರಾಪುರಮಠದ ಮಧ್ಯೆ ಇರುವ ಶತಮಾನಗಳ ಹಿಂದಿನಿಂದಲೂ ಇರುವ ಸಂಬಂಧವನ್ನು ವಿವರಿಸಿದ್ದಲ್ಲದೇ ಗೋಕರ್ಣದ ಸರ್ವಾಂಗೀಣ ಅಭಿವೃದ್ಧಿಗಾಗಿ ಸಂಕಲ್ಪಿಸಿರುವ ರಾಘವೇಶ್ವರ ಶ್ರೀಗಳ ಪ್ರಯತ್ನಕ್ಕೆ ಸಫಲತೆಯನ್ನು ಹಾರೈಸಿದರು.

ಶ್ರೀ ರಾಘವೇಶ್ವರಭಾರತೀ ಶ್ರೀಗಳು ಸಾರ್ವಭೌಮ ಪ್ರಶಸ್ತಿ ಪುರಸ್ಕೃತರಾದ ಮೋಹನ ಆಳ್ವರ ಸಾಧನೆಯನ್ನು ನೋಡಿ ಸಂತಸಪಟ್ಟಿದ್ದೇವೆ. ಇಂತಹ ವ್ಯಕ್ತಿಗಳು ಸಮಾಜಕ್ಕೆ ಸಂಪತ್ತು. ಕ್ರೀಡೆ, ಶಿಕ್ಷಣ, ಕಲೆ, ಸಂಗೀತ, ನೃತ್ಯ ಮೊದಲಾದ ಬಹುಮುಖ ಪ್ರತಿಭೆಗಳನ್ನು ಹೊಂದಿರುವ ಆಳ್ವ ಅನೇಕ ಹೊಸತುಗಳಿಗೆ ಹರಿಕಾರರಾದವರು ಎಂದು ಪ್ರಶಂಸಿಸಿ ನಮ್ಮ ಅಂತರ್ಮನಸ್ಸಿನ ಜಾಗೃತಿಯೇ ಶಿವರಾತ್ರಿಯ ಸಂಕೇತ. ಇದು ಮಂಗಳಕರವಾದ ಮುಂಬೆಳಗನ್ನು ಹೊಂದಿದ ರಾತ್ರಿ. ಉಳಿದ ರಾತ್ರಿಗಳಂತಲ್ಲ ಎಂದು ಹೇಳಿ ಜನರು ಒಳ್ಳೆಯದನ್ನು ಗುರುತಿಸುವಂತಹ ಗುಣಗ್ರಾಹಿಗಳಾಗುವಂತಹ ಸ್ಥಿತಿಯನ್ನು ಈ ಶಿವರಾತ್ರಿ ಪರ್ವ ನೀಡಲೆಂದು ಹಾರೈಸಿದರು.

ರೈತರ ಹೆಸರಿನಲ್ಲಿ ಪ್ರಮಾಣವಚನ ಸ್ವೀಕರಿಸಿ, ರೈತಪರ ಮುಂಗಡಪತ್ರ ಮಂಡಿಸಿ, ಕೃಷಿಪರ ಮುಖ್ಯಮಂತ್ರಿ ಎನಿಸಿದ ಬಿ.ಎಸ್. ಯಡಿಯೂರಪ್ಪನವರಿಗೆ ಪರಶಿವ ಕ್ಷೇತ್ರ ಗೋಕರ್ಣದಲ್ಲಿ ಮಹಾಶಿವರಾತ್ರಿಯ ಪರ್ವಕಾಲದಲ್ಲಿ ‘ನಂದಿ’ಯನ್ನು ಪ್ರದಾನ ಮಾಡಲಾಯಿತು.

ಗೋಕರ್ಣ ಮಂಡಲಾಧೀಶ್ವರ ಶ್ರೀ ರಾಘವೇಶ್ವರಭಾರತೀ ಮಹಾಸ್ವಾಮಿಗಳು ಅನುಗ್ರಹ ರೂಪವಾಗಿ ನಂದಿಯನ್ನು ನೀಡಿ, ನಾಡಿನ ಸುಖ-ಸಮೃದ್ಧಿ ಇನ್ನೂ ಹೆಚ್ಚಿನ ರೀತಿಯಲ್ಲಿ ವೃದ್ಧಿಸಲಿ ಎಂದು ಹಾರೈಸಿದರು.
ಭಕ್ತಿಭಾವದಿಂದ ಭಾವುಕರಾದ ಮುಖ್ಯಮಂತ್ರಿಯವರು ನಂದಿಯ ಶಿರಕ್ಕೆ ತಲಬಾಗಿ ವಂದಿಸಿ, ಶ್ರೀಮಠ ನೀಡಿದ ಅಪೂರ್ವ ಕೊಡುಗೆಯನ್ನು ಆತ್ಮೀಯವಾಗಿ ಸ್ವೀಕರಿಸಿದರು.

Audience at Dharma Sabha

ಈ ಸಂದಣಿ ನಿನ್ನೆ ರಾತ್ರಿಯಿಂದಲೇ ನೆರೆಯಲು ಶುರುವಾಗಿದೆ. ಶಿವರಾತ್ರಿಯ ಪ್ರಯುಕ್ತ ಆತ್ಮಲಿಂಗಕ್ಕೆ ಮೊದಲ ಅಭಿಷೇಕ ನಿನ್ನೆ ಮಧ್ಯರಾತ್ರಿಯೇ ಪ್ರಾರಂಭವಾಗಿದ್ದು, ಇಂದೂ ಮುಂದುವರೆದಿದೆ.
ರಾತ್ರಿ ಹಗಲುಗಳ ಯಾವುದೇ ಭೇದವಿಲ್ಲದೇ ಬಂದ ಭಕ್ತಸ್ತೋಮ ಮೊದಲು ಕೋಟಿತೀರ್ಥದಲ್ಲಿ ಮಿಂದು ನಂತರ ಸಮುದ್ರಕ್ಕೆ ಮೈಕೊಟ್ಟು ಅನಂತರ ಅಭಿಷೇಕದ ಸರತಿ ಸಾಲಿನಲ್ಲಿ ನಿಲ್ಲಲು ಧಾವಿಸುತ್ತಿದೆ. ಒಂದು ಸಾಲು ಕೋಟಿತೀರ್ಥದ ಕಡೆಯಿಂದ ದೇವಾಲಯವನ್ನು ಪ್ರವೇಶಿಸಿದರೆ, ಮತ್ತೊಂದು ಸಮುದ್ರದ ಕಡೆಯಿಂದ, ಹೀಗೆ ನಾಲ್ಕೂ ದಿಕ್ಕುಗಳಿಂದ ದೇವಾಲಯಕ್ಕೆ ಭಕ್ತ ಸಾಗರ ಹರಿಯುತ್ತಿದೆ.
ಈ ಬಾರಿಯ ವಿಶೇಷವಾಗಿ ‘ಗಂಗಾ ಜಲಾಭಿಷೇಕ’ವನ್ನು ಇಟ್ಟುಕೊಳ್ಳಲಾಗಿದೆ. ಅದಕ್ಕಾಗಿ ಗಂಗೆಯನ್ನು ಹೃಷೀಕೇಶದಿಂದ ತರಲಾಗಿದ್ದು, ಅಭಿಷೇಕವನ್ನು ಗೈಯ್ಯಲು ಜನ ಮುಗಿಬೀಳುತ್ತಿದ್ದಾರೆ. ಗಂಗೆಯನ್ನು ಶಿವನ ಶಿರಕ್ಕೆ ಸುರಿಯುವ ಧನ್ಯತಾ ಭಾವ ಮುಗಿಲುಮುಟ್ಟುತ್ತಿದೆ.
ಅಭೀಷೇಕದ ನಂತರ ಅಮೃತ ಫಲಾಹಾರದ ಸ್ವಾದಾಸ್ವಾದ. ಶಿವರಾತ್ರಿಯಾದುದರಿಂದ ಇಂದು ಉಪವಾಸ. ಅದಕ್ಕಾಗಿ ಸಿದ್ಧಪಡಿಸಲಾಗಿರುವ ಲಘು ಆಹಾರ – ಅವಲಕ್ಕಿ, ಉಪ್ಪಿಟ್ಟು, ಇಡ್ಲಿ, ಪಾಯಸ ಭಕ್ತಾದಿಗಳ ಮೈಮನಗಳನ್ನು ತಂಪಾಗಿ, ಹಗುರ ಭಾವದಲ್ಲಿ ನಿಲ್ಲಿಸುತ್ತಿದೆ.