ಗೋಕರ್ಣ, ಫೆ ೨: ಇದೇ ಬರುವ ೧೭ರಿಂದ ೨೬ನೆ ತಾರೀಕಿನ ವರೆಗೆ ಇಲ್ಲಿ ನಡೆಯುವ ಶಿವರಾತ್ರಿ ಕಾರ್ಯಕ್ರಮದ ಸಿದ್ಧತೆಗಾಗಿ ಕಾರ್ಯಕರ್ತರ ಸಿದ್ಧತಾ ಸಭೆ ನಡೆಯಿತು. ಶ್ರೀ ಸಂಸ್ಥಾನ ಗೋಕರ್ಣ ಶ್ರೀ ಶ್ರೀ ರಾಘವೇಶ್ವರ ಭಾರತೀ ಸ್ವಾಮಿಗಳವರ ಅಧ್ಯಕ್ಷತೆ ಹಾಗೂ ಮಾರ್ಗದರ್ಶನದಲ್ಲಿ ನಡೆದ ಈ ಸಭೆಯಲ್ಲಿ ಮುಂಬರುವ ಉತ್ಸವವನ್ನು ಅಂತರ್ ರಾಷ್ಟ್ರೀಯ ಮಟ್ಟದಲ್ಲಿ ಬೆಳಗುವಂತೆ ಪೂರ್ವತಯಾರಿಗೆ ವಿದ್ಯುಕ್ತ ಚಾಲನೆ ದೊರಕಿತು. ಸಾಂಸ್ಕೃತಿಕ , ಧಾರ್ಮಿಕ ಹಾಗೂ ಸಭಾ ಕಾರ್ಯಕ್ರಮದ ರೂಪುರೇಶೆಗಳನ್ನು ಅಂತಿಮಗೊಳಿಸಲಾಯಿತು.
ಪತ್ರಿಕಾ ವರದಿಗಾರರೊಂದಿಗೆ ಮಾತನಾಡಿ ಶ್ರೀ ಗುರುಗಳು

ಶಿವರಾತ್ರಿ ಸಿದ್ಧತಾ ಸಭೆ

ಗೋಕರ್ಣದ ಸಮಗ್ರ ಅಭಿವೃದ್ಧಿಯ ತಮ್ಮ ಕನಸನ್ನು ಬಿಚ್ಚಿಟ್ಟರು. ‘ವಿಶ್ವಕ್ಕೆ ಒಂದೇ ಗೋಕರ್ಣ, ವರ್ಷಕ್ಕೆ ಒಂದೇ ಶಿವರಾತ್ರಿ’ ಎಂದು ಸಾರಿದ ಅವರು, ಈ ಶಿವರಾತ್ರಿಯಲ್ಲಿನ ಹಲವು ಚೊಚ್ಚಲತೆಯನ್ನು ವಿವರಿಸಿದರು. ಸಮಾಜದಲ್ಲಿ ವಿಶೇಷ ಸಾಧನೆಮಾಡಿದವರಿಗೆ ಮಹಾಬಲದೇವನ ಹೆಸರಿನಲ್ಲಿಪ್ರಶಸ್ತಿ ಪ್ರದಾನ ಮಾಡುವ ಸಂಪ್ರದಾಯಕ್ಕೆ ಚಾಲನೆಕೊಡಲಾಗುವುದು. ಎಲ್ಲ ಭಕ್ತರೂ ಶಿವನ ಆತ್ಮಲಿಂಗಕ್ಕೆ ಗಂಗಾಭಿಷೇಕ ನಡೆಸುವ ವಿಶೇಷ ಸೇವೆಯನ್ನು ಈ ಸಲ ಆರಂಭಿಸಲಾಗುವುದು ಎಂದು ತಿಳಿಸಿದರು.

ಅಂತೆಯೇ ಗೋಕರ್ಣದ ಅಭಿವೃದ್ಧಿಗಾಗಿ ‘ಗೋಕರ್ಣ ಅಭಿವೃದ್ಧಿ ಪ್ರಾಧಿಕಾರ’ ವನ್ನು ಆರಂಭಿಸುವಂತೆ ಸರಕಾರದ ಮುಂದೆ ಬೇಡಿಕೆಯನ್ನಿತ್ತರು. ಗೋಕರ್ಣದ ಸಮಗ್ರ ಮಾಹಿತಿಗಾಗಿ ನೂತನ ವೆಬ್ ಸೈಟನ್ನು ಕಾರ್ಯಾರಂಭಗೊಳಿಸಿದರು. ಈ ವೆಬ್-ಸೈಟ್ ವಿದ್ಯುಕ್ತವಾಗಿ ಶಿವರಾತ್ರಿಯಂದು ಉದ್ಘಾಟನೆಗೊಳ್ಳಲಿದೆ ಎಂದು ತಿಳಿಸಿದರು. ಶಿವರಾತ್ರಿಯ ಪೂರ್ವಭಾವಿಯಾಗಿ ರಥಪೂಜೆಯನ್ನು ಶ್ರೀಗುರುಗಳು ನಡೆಸಿಕೊಟ್ಟರು.

ಸ್ಥಳೀಯ ಶಾಸಕರಾದ ಶ್ರೀ ದಿನಕರ ಶೆಟ್ಟಿ , ಉಪಾಧಿವಂತರ ಸಮಿತಿ ಹಿರಿಯರು, ಶ್ರೀ ಗೋಕರ್ಣ ದೇವಾಲಯದ ಆಡಳಿತ ಸಮಿತಿ ಸದಸ್ಯರು, ಹತ್ತು ಮಹನೀಯರು ಈ ಸಭೆಯಲ್ಲಿ ನೆರೆದಿದ್ದರು. ಗೋಕರ್ಣ ದೇವಾಲಯ ಹಾಗೂ ಪರಿಸರದ ಸಮಗ್ರ ಅಭಿವೃದ್ಧಿಗಾಗಿ ಯೋಜನೆಯನ್ನು ಹಮ್ಮಿಕೊಂಡು, ಆ ಮೂಲಕ ಸಂಪೂರ್ಣ ಕ್ಷೇತ್ರದ ಅಭಿವೃದ್ಧಿಯ ಕನಸನ್ನು ಶ್ರೀಗುರುಗಳು ಹಂಚಿಕೊಂಡರು.